پاکستان، سعودیہ، ترکیہ کا سربراہی اجلاس آج، مشترکہ دفاعی معاہدے پر دستخط متوقع

سعودی عرب، پاکستان اور ترکیہ کے درمیان مشترکہ دفاعی معاہدے کو حتمی شکل دینے کے لیے آج جدہ میں ایک اہم سربراہی اجلاس منعقد ہو رہا ہے، جس میں تینوں ممالک کی اعلیٰ ترین قیادت شرکت کر رہی ہے۔

فرانسیسی خبر رساں ادارے نے سعودی فوجی ذرائع کے حوالے سے دعویٰ کیا ہے کہ تینوں ممالک کے درمیان دفاعی تعاون کو مضبوط بنانے کے لیے مشترکہ معاہدے پر دستخط آج جدہ میں کیے جائیں گے۔ نام ظاہر نہ کرنے کی شرط پر ذرائع نے بتایا کہ اس سہ فریقی معاہدے پر طویل عرصے سے بات چیت جاری تھی، تاہم خطے کی حالیہ تیز تر سیکیورٹی پیش رفت اور سیاسی حالات نے اس عمل کو جلد از جلد حتمی شکل دینے میں اہم کردار ادا کیا ہے۔

ذرائع کے مطابق سعودی عرب کے ولی عہد شہزادہ محمد بن سلمان، ترکیہ کے صدر رجب طیب اردوان اور پاکستان کے وزیراعظم شہباز شریف کے درمیان جدہ میں اعلیٰ سطحی ملاقات ہوگی۔ واضح رہے کہ سعودی ولی عہد کی دعوت پر وزیراعظم شہباز شریف اور فیلڈ مارشل سید عاصم منیر پہلے ہی جدہ پہنچ چکے ہیں۔

دوسری جانب ترک صدارتی شعبۂ مواصلات کے سربراہ برہان الدین دوران نے سوشل میڈیا پر اپنے ایک بیان میں تصدیق کی ہے کہ دورے کے دوران باہمی دلچسپی کے امور، خطے کی مجموعی صورتحال اور دوطرفہ و سہ طرفہ تعلقات کے فروغ پر تفصیلی تبادلہ خیال کیا جائے گا۔