ایرانی دفاعی ٹیکنالوجی سب سے بہترین، خطے کے ممالک کو جلد اندازہ ہوجائیگا: مجید ابن الرضا

قائم مقام ایرانی وزیرِ دفاع مجید ابن الرضا نے دعویٰ کیا ہے کہ ایران کی تیار کردہ مقامی دفاعی ٹیکنالوجی علاقائی ممالک کے مقابلے میں سب سے بہترین ہے اور خطے کے دیگر ممالک کو اس کا جلد اندازہ ہو جائے گا۔

اپنے ایک بیان میں قائم مقام ایرانی وزیرِ دفاع نے کہا کہ دشمن کی فوجی طاقت اب تیزی سے زوال پذیر ہو رہی ہے، جبکہ خطے کے کچھ ممالک اب بھی اپنی سیکیورٹی کے لیے صرف غیر ملکی انحصار اور درآمد شدہ ہتھیاروں کے بھروسے پر بیٹھے ہیں۔ انہوں نے واضح کیا کہ ایران نے اپنی دفاعی صلاحیتوں کو مکمل طور پر خود کفیل بنایا ہے۔

دوسری جانب ایرانی فوج کے ترجمان بریگیڈیئر جنرل امیر اکرمینیا نے فوج کی تیاریوں پر بات کرتے ہوئے کہا کہ ایرانی افواج کسی بھی قسم کے بیرونی یا علاقائی خطرات سے نمٹنے کے لیے ہمہ وقت اور مکمل طور پر تیار ہیں۔ انہوں نے مزید بتایا کہ حالیہ حملوں سے متاثر ہونے والے دفاعی نظاموں کی مرمت کے ساتھ ساتھ انہیں جدید تر بنایا جا رہا ہے۔