حوثی باغیوں کا سعودی عرب پر حملہ، ایک پاکستانی سمیت 11 شہری زخمی

یمن کے حوثی باغیوں نے سعودی عرب کے جنوبی صوبے نجران پر ایک اور حملہ کیا ہے، جس کے نتیجے میں ایک پاکستانی شہری اور چار سالہ بچے سمیت 11 شہری زخمی ہو گئے ہیں۔

سعودی عرب کی قیادت میں قائم عسکری اتحاد کے ترجمان میجر جنرل ترکی المالکی نے واقعے کی تفصیلات بتاتے ہوئے کہا کہ حوثی باغیوں کے اس بلا اشتعال حملے کے نتیجے میں زخمی ہونے والوں میں 7 سعودی شہری، 1 یمنی، 2 مصری اور 1 پاکستانی شہری شامل ہیں۔ انہوں نے کہا کہ حوثیوں نے رہائشی اور شہری آبادی کو اندھا دھند نشانہ بنایا ہے جو کہ بین الاقوامی انسانی قوانین کی سنگین خلاف ورزی ہے، تاہم شہریوں کے تحفظ کو یقینی بنانے کے لیے تمام تر ضروری اقدامات جاری رکھے جائیں گے۔

دوسری جانب سعودی حکام نے انکشاف کیا ہے کہ ایران کے حمایت یافتہ مسلح گروہ مملکت کی اہم اور حساس تنصیبات کو نشانہ بنانے کی تیاریاں کر رہے ہیں، جس کے پیشِ نظر ملک بھر کے سیکیورٹی اداروں کو ہائی الرٹ کر دیا گیا ہے۔ حکام کے مطابق یمن کے حوثی جنگجو اور عراقی ملیشیائیں، ایرانی پاسدارانِ انقلاب کی نگرانی میں ان حملوں کو انجام دے سکتی ہیں۔ انٹیلی جنس اداروں نے سرحد پار ڈرونز اور میزائلوں کی مشکوک نقل و حرکت کا بھی مشاہدہ کیا ہے، جس کے باعث توانائی کی تنصیبات، بندرگاہوں اور ہوائی اڈوں کی سیکیورٹی سخت کر دی گئی ہے۔