سعودیہ میں عراقی ملیشیا اور حوثیوں کے حملوں کا خدشہ، سکیورٹی ادارے ہائی الرٹ

سعودی عرب نے شدید خدشہ ظاہر کیا ہے کہ ایرانی پاسدارانِ انقلاب (IRGC) کی براہِ راست نگرانی میں عراقی ملیشیا اور یمن کے حوثی باغی مملکت پر شمال اور جنوب کی جانب سے جلد مشترکہ ڈرون و میزائل حملے کر سکتے ہیں۔

خبر رساں ادارے ‘رائٹرز’ سے گفتگو کرتے ہوئے ایک سینئر سعودی عہدیدار نے نام ظاہر نہ کرنے کی شرط پر بتایا کہ سعودی عرب، امریکہ اور دیگر علاقائی اتحادی ممالک کی انٹیلی جنس رپورٹس کے مطابق ان ممکنہ حملوں میں توانائی کی تنصیبات، بحری بندرگاہوں، ہوائی اڈوں اور دیگر اہم شہری و معاشی اہداف کو نشانہ بنایا جا سکتا ہے۔

سعودی حکام کا کہنا ہے کہ سرحد پار ڈرونز اور میزائلوں کی مشکوک نقل و حرکت دیکھی گئی ہے، جس سے بیک وقت مختلف سمتوں سے مربوط حملوں کا امکان بڑھ گیا ہے۔ حکام کے مطابق یہ تخریبی کارروائیاں ایران اور دیگر علاقائی فریقوں کے درمیان جاری حساس سفارتی کوششوں کو سبوتاژ کرنے کے لیے بھی کی جا سکتی ہیں۔

سعودی عہدیدار نے مزید واضح کیا کہ امریکہ کے ساتھ مملکت کا دفاعی اور انٹیلی جنس تعاون اس وقت انتہائی مضبوط ہے اور کسی بھی قسم کی ممکنہ جارحیت یا حملے کا فوری و مؤثر جواب دینے کے لیے تمام تر ضروری سیکیورٹی اقدامات مکمل کر لیے گئے ہیں۔