راجہ فاروق حیدر کا آزاد کشمیر الیکشن میں پیپلزپارٹی پر دھاندلی، انتظامی مشینری کے استعمال کا الزام

سابق وزیرِ اعظم آزاد کشمیر راجہ فاروق حیدر نے آزاد کشمیر امتحانات اور الیکشن کے حوالے سے بڑا بیان دیتے ہوئے پاکستان پیپلز پارٹی پر شدید تنقید کی ہے اور انتخابات میں دھاندلی اور انتظامی مشینری کے بے جا استعمال کا الزام عائد کیا ہے۔

انتخابات میں کامیابی کے بعد اپنے آبائی علاقے چکار آمد پر کارکنوں سے خطاب کرتے ہوئے راجہ فاروق حیدر نے کہا کہ پیپلز پارٹی نے الیکشن میں بے تحاشا پیسہ بہا کر لوگوں کے ضمیر خریدنے کی کوشش کی۔ انہوں نے کہا کہ آزاد کشمیر کے عوام نے میاں محمد نواز شریف کے ترقی اور خوشحالی کے وژن پر اپنے بھرپور اعتماد کا اظہار کیا ہے۔ انہوں نے مزید کہا کہ پاکستان میں ماضی میں بزدل حکمرانی کی وجہ سے بھارت کو 5 اگست کا اقدام کرنے کی ہمت ہوئی، تاہم وہ وقت دور نہیں جب مقبوضہ کشمیر آزاد ہو کر پاکستان کا حصہ بنے گا۔

سابق وزیراعظم نے نئی حکومت پر زور دیا کہ آزاد کشمیر میں نظریۂ پاکستان کے فروغ، امن و امان اور بھائی چارے کے قیام کے لیے عملی اقدامات اٹھائے جائیں۔ آزاد کشمیر میں حکومت سازی اور قائدِ ایوان کے انتخاب کے حوالے سے بات کرتے ہوئے انہوں نے کہا کہ وزارتِ عظمیٰ کے امیدوار کا حتمی فیصلہ قائد ن لیگ نواز شریف کریں گے، اور ان کا ہر فیصلہ کشمیر کی بہتری کے حق میں ہوگا۔ چکار پہنچنے پر ن لیگ کے کارکنوں نے ان کا پرجوش استقبال کیا اور پاکستان و پاک فوج کے حق میں فلک شگاف نعرے بازی کی۔