جمہوری حکومت کبھی فاشسٹ نہیں ہوتی، ملک کو بحران سے نکالنے کی صلاحیت صرف بانی چیئرمین میں ہے: علامہ راجہ ناصر عباس

سینیٹ میں اپوزیشن لیڈر علامہ راجہ ناصر عباس نے میڈیا سے گفتگو کرتے ہوئے کہا ہے کہ کوئی بھی جمہوری حکومت کبھی فاشسٹ نہیں ہو سکتی اور وہ ہمیشہ عوام سے محبت سے بات کرتی ہے۔ انہوں نے کہا کہ ملک میں امن و امان اور معاشی حالات خراب ہو چکے ہیں جبکہ عدلیہ سمیت پورا نظام کوپس کر گیا ہے، لیکن گولی کے ذریعے امن نہیں لایا جا سکتا۔ علامہ راجہ ناصر عباس کا کہنا تھا کہ سابق وزیراعظم کو جیل میں بند رکھا گیا ہے، اور موجودہ حکمران ڈرے ہوئے ہیں جنہوں نے راستوں پر کیل لگا رکھے ہیں، تاہم ہم سیاسی رویہ اپناتے ہوئے پرامن لانگ مارچ کی حمایت کریں گے۔ انہوں نے زور دیا کہ پاکستان کو بحران سے نکالنے کے لیے صرف بانی چیئرمین ہی تمام اکائیوں (سندھ، کے پی، پنجاب اور بلوچستان) کو راضی کرنے کی صلاحیت رکھتے ہیں۔ انہوں نے مزید کہا کہ فری اینڈ فیئر الیکشن اور عوام کے ساتھ ریاست کے معاہدے پر فوکس کیا جانا چاہیے، ہم بات چیت کے ذریعے پاکستان کی بہتری کی طرف جانے کے لیے تیار ہیں اور ہمارا احتجاج ہمیشہ پرامن ہوگا۔