بھارت نے ایک اور فالز فلیگ آپریشن کا ڈرامہ رچایا، ڈی جی آئی ایس پی آر نے بھانڈا پھوڑ دیا

ڈی جی آئی ایس پی آر لیفٹیننٹ جنرل احمد شریف چودھری نے پریس کانفرنس کرتے ہوئے انکشاف کیا ہے کہ 29 ستمبر کو بھارت نے ایک بار پھر فالس فلیگ آپریشن کا گھناؤنا ڈرامہ رچایا اور دعویٰ کیا کہ لشکر طیبہ کا دہشت گرد اور ایس ایس جی کا حوالدار محمد آصف مارا گیا ہے۔ پاک فوج کے ترجمان نے زندہ “سپرمین” حوالدار محمد آصف کو میڈیا کے سامنے پیش کر دیا، جنہوں نے خود پر لگائے گئے بھارتی الزامات کی شدید مذمت کرتے ہوئے بتایا کہ وہ ضلع اٹک کے پنڈی گھیپ کے رہائشی ہیں اور 2023 میں ایس ایس جی سے ریٹائرڈ ہوئے ہیں۔ ڈی جی آئی ایس پی آر نے بھارت کو دنیا کی سب سے بڑی دہشت گرد ریاست قرار دیتے ہوئے کہا کہ بھارت مکتی باہنی اور ٹی ٹی پی کی فنڈنگ اور پاکستان مخالف دہشت گردی میں ملوث ہے، جبکہ افغان طالبان رجیم بھی دہشت گردی کی سہولت کاری کر رہی ہے۔ انہوں نے دوٹوک الفاظ میں تنبیہ کی کہ افواج پاکستان دشمن کے ہر اقدام کے لیے مکمل تیار ہیں اور اس بار ہمارا جواب انتہائی دردناک ہوگا۔ لیفٹیننٹ جنرل احمد شریف چودھری نے مزید واضح کیا کہ پاکستان سعودی عرب کے ساتھ مشترکہ دفاعی معاہدے پر عملدرآمد کے لیے پرعزم ہے، جبکہ مسلح افواج کا سیاست سے کوئی تعلق نہیں ہے۔