گورنر راج یا ایمرجنسی کی افواہوں پر گہری تشویش ہے، تمام تر تحفظات کے باوجود مذاکرات کے لیے تیار ہیں: بیرسٹر گوہر

پاکستان تحریک انصاف کے چیئرمین بیرسٹر گوہر نے میڈیا سے گفتگو کرتے ہوئے کہا ہے کہ پارٹی اجلاس میں لانگ مارچ کی حکمت عملی کے ساتھ ساتھ ملک میں ممکنہ طور پر گورنر راج یا ایمرجنسی نافذ کرنے کی خبروں پر بھی سنجیدگی سے غور کیا گیا ہے۔ انہوں نے بانی چیئرمین کی بہنوں کو جیل میں رکھنے، ان کے ساتھ روا رکھے جانے والے نامناسب سلوک اور اراکینِ اسمبلی (ایم این ایز اور ایم پی ایز) کی گرفتاریوں کی شدید مذمت کرتے ہوئے واضح کیا کہ پی ٹی آئی ہمیشہ ریاست اور پاکستان کے ساتھ کھڑی رہی ہے لیکن حکمران مسلسل آواز دبانے کی کوشش کر رہے ہیں۔ بیرسٹر گوہر کا کہنا تھا کہ وفاق اس وقت مضبوط ہوتا ہے جب صوبے خود مختار ہوں، اور عوام کی مرضی کے خلاف اقدامات سے وفاق کمزور ہوگا۔ انہوں نے کہا کہ سپریم کورٹ کے احکامات پر عملدرآمد نہیں ہو رہا اور ہمارے مطالبات نہیں مانے جا رہے، اس کے باوجود ہم ملک اور جمہوریت کی بہتری کے لیے اب بھی مذاکرات کی میز پر بیٹھنے کے لیے تیار ہیں۔