اے آئی سے ٹریفک اہلکار کے قتل کا طریقہ پوچھنا نوجوان کو مہنگا پڑ گیا

نیشنل سائبر کرائم انویسٹی گیشن ایجنسی (NCCIA) نے اپنے والد کی مبینہ توہین کا بدلہ لینے کے لیے ٹریفک اہلکار کے قتل کا طریقہ کار آرٹیفیشل انٹیلی جنس (AI) سے پوچھنے والے ایک نوجوان کو حراست میں لینے کے بعد تفتیش کر کے رہا کر دیا ہے۔

ذرائع کے مطابق امریکی تحقیقاتی ادارے ایف بی آئی (FBI) نے نوجوان کی مشکوک آن لائن سرگرمیوں سے متعلق این سی سی آئی اے کراچی کو باضابطہ طور پر آگاہ کیا تھا، جس پر فوری کارروائی کرتے ہوئے ایجنسی نے نوجوان کو کراچی کے پوش علاقے پی ای سی ایچ ایس (PECHS) سے اپنی تحویل میں لے لیا۔

حراست میں لینے کے بعد این سی سی آئی اے حکام نے نوجوان سے تفصیلی پوچھ گچھ کی۔ دورانِ تفتیش نوجوان نے اپنا مؤقف پیش کرتے ہوئےکشادہ کیا کہ وہ کوئی حقیقی جرم کرنے کا ارادہ نہیں رکھتا تھا، بلکہ وہ ایک فرضی کرائم اسٹوری کی اسکرپٹنگ اور کہانی نویسی کے لیے اے آئی سے مدد لے رہا تھا، اور اسی تخلیقی سلسلے میں اس نے ٹریفک اہلکار کے قتل کے مختلف طریقہ کار سے متعلق سوال کیا تھا۔

نوجوان نے انکشاف کیا کہ اس کے والد کی توہین کا حقیقت میں کوئی واقعہ پیش ہی نہیں آیا تھا اور یہ تمام صورتحال صرف ایک فرضی کرائم کہانی کا حصہ تھی۔ ذرائع کے مطابق این سی سی آئی اے کی جانب سے معاملے کی گہرائی سے جانچ پڑتال اور تسلی بخش تفتیش کے بعد حراست میں لیے گئے نوجوان کو رہا کر دیا گیا ہے۔