افغانستان میں 36 سے زائد دہشت گرد گروہ موجود ہیں، ہمسایہ ممالک کے خلاف دہشت گردی روکی جائے: ترجمان دفتر خارجہ

ترجمان دفتر خارجہ نے ہفتہ وار پریس بریفنگ کے دوران واضح کیا ہے کہ پاکستان ایک قوانین پر مبنی عالمی نظام اور طے شدہ فریم ورک پر عمل درآمد کا عزم رکھتا ہے، جبکہ امریکہ اور ایران پر زور دیا جاتا ہے کہ وہ تحمل سے کام لیں۔ انہوں نے انکشاف کیا کہ افغانستان میں 36 سے زائد دہشت گرد گروہ موجود ہیں جو افغان سرزمین کو محفوظ پناہ گاہوں کے طور پر استعمال کر رہے ہیں، لہٰذا کابل ہمسایہ ممالک کے خلاف دہشت گردی روکے۔ بھارتی ایس سی او نیشنل کوآرڈینیٹر کے دورہ پاکستان کا ذکر کرتے ہوئے ترجمان نے بتایا کہ مہمان عہدیدار نے سیالکوٹ سمیت دیگر مقامات کے دورے میں دلچسپی ظاہر کی ہے۔ اس کے علاوہ بھارت کی جانب سے عالمی ثالثی عدالت کے حوالے سے پھیلائی جانے والی کنفیوژن کی شدید مذمت کرتے ہوئے ترجمان نے دوٹوک الفاظ میں کہا کہ اگست میں عالمی ثالثی عدالت نے بھارتی دعوے اور اعتراضات مسترد کر دیے تھے، اور سندھ طاس معاہدہ اپنی تمام شقوں سمیت مکمل طور پر موجود ہے۔ بریفنگ میں یہ بھی بتایا گیا کہ ایس سی او اسپورٹس کے تحت ہاکی ٹورنامنٹ کی تاریخیں طے کر دی گئی ہیں جبکہ پاکستان اپنے دوست ممالک کو اصولوں کے مطابق فضائی حدود کے استعمال کی اجازت دیتا ہے۔