پاکستان میں G5 کی اوسط ڈاؤن لوڈ سپیڈ 127.74 ایم بی پی ایس ریکارڈ

ملک بھر میں فائیو جی (5G) رول آؤٹ اور موبائل نیٹ ورک کی کارکردگی سے متعلق پاکستان ٹیلی کمیونیکیشن اتھارٹی (PTA) کی ایک اہم رپورٹ سامنے آئی ہے، جس کے مطابق پاکستان میں 5G کی اوسط ڈاؤن لوڈ سپیڈ 127.74 ایم بی پی ایس ریکارڈ کی گئی ہے۔

پی ٹی اے نے ‘اوپن سگنل’ کے تعاون سے سال 2026 کی دوسری سہ ماہی (Q2) کی موبائل نیٹ ورک بینچ مارکنگ رپورٹ جاری کی ہے، جس میں ملک کے 20 بڑے شہروں میں موبائل نیٹ ورک کے صارف تجربے کا جائزہ لیا گیا ہے اور 4G اور 5G ٹیکنالوجیز کی کارکردگی کا تقابلی جائزہ پیش کیا گیا ہے۔

• رفتار کا موازنہ: رپورٹ کے مطابق پاکستان میں 5G کی ڈاؤن لوڈ سپیڈ 4G کے مقابلے میں تقریباً 6.8 گنا زیادہ ریکارڈ ہوئی ہے، جبکہ 5G کی قومی اوسط اپ لوڈ سپیڈ 12.7 ایم بی پی ایس رہی۔

• صارفین کا وقت اور تجربہ: رپورٹ 90 روز کے حقیقی صارفین کے ڈیٹا پر مبنی ہے، جس کے مطابق 5G پر صارفین کے نیٹ ورک استعمال کا وقت 3.95 فیصد جبکہ 4G پر یہ شرح 93.67 فیصد رہی۔ اس دوران 5G پر ویڈیو ایکسپیرینس سکور 100 میں سے 67.33 جبکہ موبائل گیمنگ ایکسپیرینس سکور 62.05 ریکارڈ کیا گیا۔

• 4G کی کارکردگی: اعداد و شمار کے مطابق پاکستان میں 4G کی قومی اوسط ڈاؤن لوڈ سپیڈ 18.9 ایم بی پی ایس ریکارڈ کی گئی، جبکہ ہائی اینڈ ڈیوائسز پر 4G کی اوسط ڈاؤن لوڈ سپیڈ 31.3 ایم بی پی ایس اور قومی اوسط اپ لوڈ سپیڈ 5.32 ایم بی پی ایس رہی۔

پی ٹی اے نے اپنی رپورٹ میں واضح کیا ہے کہ یہ 5G کے نتائج ت حال ابتدائی نوعیت کے ہیں اور انہیں قومی سطح پر مکمل اور حتمی کارکردگی کا عکس قرار نہیں دیا جا سکتا، کیونکہ پاکستان میں 5G نیٹ ورک کی تعیناتی ابھی ابتدائی مراحل میں ہے جبکہ اس کی کوریج بھی محدود ہے اور صارفین کی تعداد بھی فی الحال کم ہے۔