اسپیس ایکس کے اسٹار شپ راکٹ نے پہلی بار زمین کے مدار میں پہنچنے کا اہم سنگِ میل عبور کر لیا

امریکی ریاست ٹیکساس سے پرواز بھرنے والے اسپیس ایکس (SpaceX) کے طاقتور ترین راکٹ ‘اسٹار شپ’ نے پہلی بار کامیابی کے ساتھ زمین کے مدار میں پہنچنے کا تاریخی سنگِ میل عبور کر لیا ہے، تاہم پرواز کے دوران انجن میں تکنیکی خرابی کے باعث 10 گھنٹے کا طے شدہ مشن 3 گھنٹے بعد ہی قبل از وقت ختم کرنا پڑا۔ اسٹار شپ کی اس 14ویں ازمائشی پرواز کے دوران مدار میں پہنچتے ہی 26 اسٹار لنک سیٹلائٹس کو خلا میں کامیابی سے تعینات کیا گیا، جو اس راکٹ کی تاریخ کا پہلا تجارتی مشن (Commercial Mission) بھی شمار ہو رہا ہے۔

پرواز کے دوران ایک موقع پر راکٹ کے 3 مرکزی انجنوں میں سے ایک انجن وقت سے پہلے اچانک بند ہو گیا جس سے مشن کی ناکامی کے خدشات پیدا ہو گئے تھے، تاہم اسپیس ایکس کے انجینئرز نے دیگر فعال انجنوں کا استعمال کرتے ہوئے اسٹار شپ کو بحفاظت مدار میں پہنچانے کا ہدف حاصل کر لیا۔ خلائی کمپنی اسپیس ایکس رواں سال کے آخر سے اپنے اس جدید ترین راکٹ اسٹار شپ کو باقاعدہ اور تجارتی بنیادوں پر خلائی مشنز کے لیے استعمال کرنے کا منصوبہ رکھتی ہے۔