شانگلہ میں گھر کی چھت گرنے سے 6 بچے جاں بحق

شانگلہ: خیبر پختونخوا کے ضلع شانگلہ میں ایک انتہائی افسوسناک اور دلخراش واقعہ پیش آیا ہے، جہاں گھر کی چھت گرنے کے نتیجے میں 6 معصوم بچے جاں بحق ہو گئے ہیں۔

ریسکیو حکام کے مطابق، یہ اندوہناک واقعہ شانگلہ کی تحصیل الپوری کے علاقے ‘رحیم آباد’ میں گزشتہ رات پیش آیا، جہاں ایک مکان کی چھت اچانک زمین بوس ہو گئی۔

واقعے کے فوراً بعد مقامی سطح پر ہنگامی صورتحال پیدا ہو گئی اور ریسکیو آپریشن شروع کیا گیاحکام کا کہنا ہے کہ چھت گرنے کی وجہ سے کمرے میں موجود 7 بچے ملبے تلے دب گئے تھے۔ امدادی ٹیموں نے ملبہ ہٹا کر بچوں کو نکالنے کی کوشش کی، تاہم افسوسناک طور پر 6 بچے زخموں کی تاب نہ لاتے ہوئے جاں بحق ہو گئے۔ ملبے تلے دبی ایک معصوم بچی کو معجزاتی طور پر بحفاظت اور زندہ نکال لیا گیا ہے۔

ریسکیو حکام کا مزید کہنا ہے کہ واقعے کی اطلاع ملتے ہی ریسکیو ٹیموں اور مقامی افراد نے فوری طور پر مشترکہ امدادی کارروائیاں شروع کر کے ملبہ ہٹانے کا کام مکمل کیا، اور اب جائے وقوعہ پر امدادی کارروائیاں مکمل کر لی گئی ہیں۔ مقتول بچوں کی لاشوں کو ضروری کارروائی کے بعد ہسپتال اور پھر ان کے گھر منتقل کر دیا گیا ہے، جس کے بعد علاقے کی فضا سوگوار ہے۔