آبنائے ہرمز کے قریب نئی کشیدگی، بندر عباس اور جزیرہ قشم کے قریب یکے بعد دیگرے دھماکے

ایران کے جنوبی ساحلی شہر بندر عباس اور جزیرہ قشم کے اطراف ایک بار پھر زور دار دھماکوں کی آوازیں سنی گئی ہیں، جس کے بعد خطے میں پہلے سے موجود تزویراتی کشیدگی مزید شدت اختیار کر گئی ہے۔ ایرانی خبر رساں ایجنسی ‘مہر’ کے مطابق، اتوار کو ہونے والے ان دھماکوں سے ابتدائی اطلاعات میں کسی رہائشی یا تجارتی انفراسٹرکچر کو نقصان نہیں پہنچا اور نہ ہی کسی شہری ہلاکت کی تصدیق ہوئی ہے۔ تاہم، رپورٹ میں انکشاف کیا گیا ہے کہ گزشتہ چند راتوں کے دوران ایران کے جنوبی ساحلی علاقوں پر امریکی افواج کی جانب سے مبینہ حملے کیے گئے، جن میں متعدد ماہی گیر اور دفاع پر مامور اہلکار جان کی بازی ہار چکے ہیں۔ ایرانی حکام نے ان کارروائیوں کو ملکی خودمختاری کی سنگین خلاف ورزی قرار دیتے ہوئے امریکا پر خطے میں جنگ کی آگ کو ہوا دینے کا الزام عائد کیا ہے، جب کہ امریکی حکام کی جانب سے اس پر تاحال کوئی باضابطہ ردعمل سامنے نہیں آیا۔ دفاعی مبصرین کے مطابق، آبنائے ہرمز کے قریب واقع ان حساس ترین علاقوں میں کشیدگی عالمی سمندری تجارت اور تیل کی ترسیل پر براہِ راست اثر انداز ہو سکتی ہے۔