نئی گج ڈیم کی تعمیر مکمل ہونے تک عدالتی مداخلت پر پابندی

وفاقی آئینی عدالت نے نئی گج ڈیم کی تعمیر سے متعلق کیس کا تفصیلی فیصلہ سناتے ہوئے سندھ ہائی کورٹ کے سابقہ فیصلے اور احکامات کو کالعدم قرار دے دیا ہے اور منصوبے کی تکمیل تک کسی بھی عدالت کو اس معاملے میں مداخلت سے روک دیا ہے۔ چیف جسٹس امین الدین خان کا تحریر کردہ 17 صفحات پر مشتمل تفصیلی فیصلہ جاری کر دیا گیا ہے، جس میں واضح کیا گیا ہے کہ ان ہدایات کا مقصد مزید قانونی چارہ جوئی کو ایک اہم عوامی بنیادی ڈھانچے کے منصوبے کی بروقت تکمیل میں رکاوٹ بننے سے روکنا ہے۔ فیصلے میں ریمارکس دیے گئے ہیں کہ ہائی کورٹ نے قانون کو مدنظر رکھے بغیر غلط ہدایات جاری کیں اور اپنے احکامات میں تنازعات کے حل سے متعلق معاہدے، واپڈا ایکٹ اور نیب قوانین کو بھی پیشِ نظر نہیں رکھا۔ عدالت نے قرار دیا کہ آرٹیکل 199 کے تحت ہائی کورٹ کے دائرۂ اختیار کو ازسرِ نو نہیں لکھا جا سکتا اور آئینی حدود سے تجاوز انصاف کی کھلی خرابی کا باعث بنتا ہے۔ وفاقی آئینی عدالت نے توقع ظاہر کی ہے کہ تمام فریقین اصل معاہدے کے مطابق کارروائی کو آگے بڑھائیں گے؛ کنٹریکٹر کی شکایت موصول ہونے پر واپڈا 15 روز کے اندر فیصلہ کرنے کا پابند ہوگا، جب کہ معاہدے کی خلاف ورزی کی صورت میں واپڈا کو قانون کے مطابق کاموں کو دوبارہ ٹینڈر کرنے کی مکمل آزادی حاصل ہوگی۔