بنگلہ دیش میں بارشوں اور سیلاب سے تباہی، اموات کی تعداد 52 ہوگئی

بنگلہ دیش میں مسلسل موسلا دھار بارشوں اور بدترین سیلاب نے بڑے پیمانے پر تباہی مچا دی ہے، جس کے نتیجے میں ہلاکتوں کی مجموعی تعداد بڑھ کر 52 ہو گئی ہے جبکہ 10 لاکھ سے زائد افراد شدید متاثر ہوئے ہیں۔ حکام کے مطابق، ملک کے 7 اضلاع میں سیلاب کی صورتحال بدستور تشویشناک بنی ہوئی ہے، جہاں سب سے زیادہ اموات کاکس بازار کے علاقے میں ریکارڈ کی گئیں۔ سیلاب کے باعث متعدد سڑکیں، پل اور بنیادی ڈھانچہ تباہ ہونے سے کئی اضلاع کا زمینی رابطہ منقطع ہو چکا ہے، جس سے امدادی کارروائیوں میں شدید مشکلات کا سامنا ہے۔ اس وقت تقریباً 2 لاکھ 67 ہزار 918 خاندان سیلابی پانی میں محصور ہیں، جنہیں محفوظ مقامات پر منتقل کرنے کے لیے بنگلہ دیشی فوج، بحریہ اور دیگر امدادی ادارے کشتیوں کے ذریعے ریسکیو آپریشنز میں مصروف ہیں۔ متاثرہ اور دور دراز علاقوں میں پھنسے شہریوں تک خوراک، پینے کا صاف پانی، ادویات اور دیگر طبی امداد پہنچانے کا سلسلہ بھی تیزی سے جاری ہے۔