او آئی سی کانفرنس، خواتین کی ترقی مسلم دنیا کی خوشحالی کی ضمانت ہے: اعظم نذیر

وفاقی وزیر قانون اعظم نذیر تارڑ نے اسلام آباد میں منعقدہ 9ویں اسلامی تنظیم (OIC) کی وزارتی کانفرنس برائے خواتین سے خطاب کرتے ہوئے کہا ہے کہ خواتین کی ترقی مسلم دنیا کی خوشحالی اور پائیدار ترقی کی ضمانت ہے۔ انہوں نے واضح کیا کہ اسلام نے 1400 سال قبل ہی خواتین کو عزت، حقوق اور قانونی شناخت عطا کر دی تھی، لہذا ہر خاتون اور بچی کو تعلیم، ترقی اور قیادت کے یکساں مواقع ملنے چاہئیں۔ ان کا کہنا تھا کہ پاکستان او آئی سی چیئرمین شپ کی ذمہ داری اتفاقِ رائے اور تعاون کے جذبے سے نبھائے گا۔ وزیر قانون نے اس بات پر زور دیا کہ خواتین کو معاشی اور سیاسی طور پر بااختیار بنانا ناگزیر ہے، اور حکومت پاکستان قومی صنفی پالیسی 2025 اور وزیراعظم ویمن ایمپاورمنٹ پیکیج پر کامیابی سے عمل پیرا ہے۔ انہوں نے تسلیم کیا کہ لاکھوں خواتین آج بھی ترقی کی راہ میں رکاوٹوں کا سامنا کر رہی ہیں، تاہم پاکستان میں پارلیمنٹ، عدلیہ، سول سروس اور کاروبار سمیت ہر شعبے میں خواتین کو محفوظ اور مساوی مواقع فراہم کرنا حکومت کی اولین ترجیح ہے۔