عمان کے ساتھ آبنائے ہرمز پر مشترکہ طریقہ کار میں امریکا رکاوٹ بن رہا ہے: اسماعیل بقائی

ایرانی وزارتِ خارجہ کے ترجمان اسماعیل بقائی نے امریکا پر شدید تنقید کرتے ہوئے الزام عائد کیا ہے کہ واشنگٹن عمان پر دباؤ ڈال کر آبنائے ہرمز کے مشترکہ طریقہ کار کی تشکیل میں مسلسل رکاوٹیں کھڑی کر رہا ہے۔ میڈیا سے گفتگو کرتے ہوئے انہوں نے واضح کیا کہ ایران آبنائے ہرمز کے معاملے پر عمان کے ساتھ ایک مشترکہ نظام وضع کرنے کی کوششیں کر رہا ہے۔ ترجمان نے مزید کہا کہ امریکا نے ‘اسلام آباد میمورنڈم’ کی سنگین خلاف ورزیاں کی ہیں اور وہ مفاہمتی یادداشت میں طے شدہ اپنی ذمہ داریاں پوری نہیں کر رہا، جس کے بعد اب اس بات میں کوئی شک نہیں رہ گیا کہ اسلام آباد ایم او یو (MoU) ختم ہو چکی ہے۔ اسماعیل بقائی نے خبردار کیا کہ باہمی معاہدوں پر عمل درآمد دونوں فریقوں کی یکساں ذمہ داری ہے؛ اگر امریکا اس پر عمل نہیں کرتا تو ایران بھی اپنے وعدوں پر عمل نہیں کرے گا اور امریکا کے خلاف جوابی کارروائیاں کرنا ایران کا جائز اور قانونی حق ہے۔