اسپیشل اکنامک زون ترمیمی آرڈیننس 2026 حکومت نے واپس لے لیا

حکومت نے اسپیشل اکنامک زون ترمیمی آرڈیننس 2026 واپس لے لیا ہے۔ سرکاری اعلامیے کے مطابق وزیراعظم نے آئین کے آرٹیکل 89(2) کے تحت آرڈیننس واپس لینے کی ایڈوائس دی۔

اس سے قبل وزیراعظم نے یہ آرڈیننس منظوری کے لیے صدرِ مملکت کو بھجوایا تھا، تاہم صدر نے 15 دن کے اندر اس پر دستخط نہیں کیے، جس کے بعد آئینی طریقہ کار کے تحت یہ خود بخود نافذ ہو گیا تھا۔

قومی اسمبلی کے اجلاس میں پیپلز پارٹی نے صدر کی منظوری کے بغیر آرڈیننس نافذ ہونے پر شدید احتجاج کیا۔ پیپلز پارٹی کے رہنما نوید قمر نے کہا کہ یہ پہلا موقع ہے کہ حکومت نے ایسا آرڈیننس نافذ کیا جس پر صدر نے دستخط نہیں کیے، اس لیے اس قانون کی کوئی آئینی حیثیت نہیں بنتی۔ انہوں نے کہا کہ ایسے حالات میں ہم اس ایوان کا حصہ نہیں بن سکتے، جس کے بعد پیپلز پارٹی نے ایوان سے واک آؤٹ کر دیا۔

وزیر قانون اعظم نذیر تارڑ نے ایوان میں وضاحت کرتے ہوئے کہا کہ حکومت کی جانب سے واضح کیا جاتا ہے کہ جب تک صدر توثیق نہ کریں، کسی بھی آرڈیننس کو باضابطہ طور پر نوٹیفائی نہیں کیا جاتا۔