ہر گھرغریب، معیشت بدترین بحران کا شکار ہے: شاہد خاقان عباسی حکومت پر برس پڑے

عوام پاکستان پارٹی کے سربراہ شاہد خاقان عباسی نے اسلام آباد میں پریس کانفرنس کرتے ہوئے کہا ہے کہ پاکستان تاریخ کے بدترین معاشی بحران سے گزر رہا ہے، جس کے باعث ہر گھر غریب ہو چکا ہے۔ انہوں نے دعویٰ کیا کہ گزشتہ 06 برسوں میں عوام کی قوتِ خرید میں 14 فیصد کمی آئی ہے جبکہ فی کس ٹیکس کا بوجھ 30 ہزار روپے سے بڑھ کر 60 ہزار روپے تک پہنچ گیا ہے۔ شاہد خاقان عباسی کے مطابق ملک میں بے روزگاری 21 سال کی بلند ترین سطح پر ہے اور 40 فیصد بچے غذائی قلت (اسٹنٹنگ) کا شکار ہیں۔ انہوں نے الزام لگایا کہ گندم کی غلط پالیسیوں سے صرف مڈل مین کو فائدہ پہنچا اور کسان و عوام کا استحصال ہوا۔ سابق وزیراعظم نے ملک میں آئین کی بالادستی، قانون کی حکمرانی اور موروثی و انتقامی سیاست کے خاتمے کا مطالبہ کرتے ہوئے یہ انکشاف بھی کیا کہ انہیں اور سینیٹ میں قائدِ حزبِ اختلاف کو مظفرآباد اور کشمیر جانے سے پولیس کی جانب سے روک دیا گیا۔