دہشتگردی کی منصوبہ بندی میں ملوث کالعدم تنظیم کے تین ملزمان کو 7، 7 سال قید کی سزا

انسدادِ دہشت گردی عدالت اسلام آباد نے دہشت گردی کی منصوبہ بندی اور کالعدم تنظیم سے تعلق کے جرم میں ملوث 03 ملزمان کو 07، 07 سال قید اور 05، 05 لاکھ روپے جرمانے کی سزا سنا دی ہے۔ جج طاہر عباس سپرا کی جانب سے جاری کردہ تحریری حکم نامے کے مطابق سزا پانے والے ملزمان حسن محمد، سلمان خان اور محمد دانش کو رواں سال اپریل میں سنگجانی کے علاقے سے خفیہ اطلاع پر گرفتار کیا گیا تھا۔ ملزمان کے قبضے سے بارودی مواد، الیکٹرک ڈیٹونیٹر، سیفٹی وائرز، 07 سلنڈر، بال بیرنگز، غیر قانونی 30 بور پستول کے علاوہ کالعدم تنظیم طالبان کے پرچم، نقشے اور خیبرپختونخوا پولیس کے جعلی شناختی کارڈز برآمد ہوئے تھے۔ عدالت نے فیصلے میں قرار دیا کہ ملزمان سے برآمد شدہ دھماکہ خیز مواد سے ان کی تخریبی نیت واضح ہوتی ہے اور وہ اپنے خلاف غلط نامزدگی کو ثابت کرنے میں مکمل ناکام رہے۔