پنجاب میں ماتحت عدلیہ کے ججز پر مونیٹائزیشن پالیسی نافذ

چیف جسٹس آف پاکستان کی زیرِ صدارت قومی جوڈیشل پالیسی کے فیصلے کے تحت پنجاب کی ماتحت عدلیہ کے ججز پر مونوٹائزیشن پالیسی کا باقاعدہ نفاذ کر دیا گیا ہے، جس کے نتیجے میں قومی خزانے کو 06 ارب روپے کی نمایاں بچت حاصل ہوئی ہے۔ دنیا نیوز اور لاہور نیوز سے خصوصی گفتگو کرتے ہوئے سینئر سول جج لاہور سعید احمد رانا نے بتایا کہ اس پالیسی کے تحت پنجاب کی ماتحت عدلیہ کے 1,708 ججز سے سرکاری ڈرائیورز، پیٹرول، گاڑیوں کی دیکھ بھال اور آئل تبدیلی کی سہولیات واپس لے لی گئی ہیں اور انہیں رعایتی قیمت پر گاڑیاں فراہم کی گئی ہیں۔ انہوں نے انکشاف کیا کہ پالیسی نافذ نہ ہونے کی صورت میں حکومتِ پنجاب کو 80 فیصد پرانی گاڑیوں کی جگہ 07 ارب روپے کی لاگت سے نئی گاڑیاں خرید کر دینا پڑتیں؛ مزید برآں 47 ججز نے مونوٹائزیشن پالیسی سے استفادہ نہ کرتے ہوئے سرکاری گاڑیاں ازخود واپس کر دیں، جبکہ باقی ججز سے گاڑیوں کی مد میں وصول کی گئی اربوں روپے کی رقم قومی خزانے میں جمع کرا دی گئی ہے۔