بارشیں اور سیلابی صورتحال: وزارت ریلوے ہائی الرٹ، افسران کی چھٹیاں منسوخ

ملک بھر میں جاری غیر معمولی بارشوں اور ممکنہ سیلابی خطرات کے پیش نظر وزارتِ ریلوے کو ہائی الرٹ کر دیا گیا ہے جبکہ تمام افسران اور عملے کی ہفتہ وار چھٹیاں منسوخ کر دی گئی ہیں۔ وفاقی وزیر ریلوے حنیف عباسی نے فیلڈ دفاتر میں ایمرجنسی نافذ کرتے ہوئے ڈویژنل سپرنٹنڈنٹس (DS) کو متاثرہ ریلوے ٹریکس اور انفراسٹرکچر کی مرمت و بحالی کے کاموں کی خود نگرانی کرنے کا حکم دیا ہے۔ انہوں نے واضح کیا کہ پاکستان ریلوے کے کنٹرول رومز 24 گھنٹے صورتحال کی مانیٹرنگ کریں گے اور وہ خود تمام افسران کی کارکردگی کا جائزہ لیں گے۔ وفاقی وزیر نے خبردار کیا ہے کہ مسافروں کی حفاظت اور ٹرین آپریشنز کی بحالی اولین ترجیح ہے، اور کسی بھی قسم کی غفلت یا نااہلی پر سخت ترین کارروائی کی جائے گی۔