آزاد کشمیر میں مہاجر نشستوں پر اعتراضات سازش کا حصہ ہیں: عطا تارڑ

وفاقی وزیرِ اطلاعات و نشریات عطا تارڑ نے کہا ہے کہ آزاد کشمیر انتخابات میں مہاجر نشستوں پر اعتراضات ایک خاص سازش کا حصہ ہیں۔ پارٹی کارکنوں سے خطاب کرتے ہوئے انہوں نے کہا کہ آزاد کشمیر میں جاری انتخابی عمل کے دوران میرپور ڈویژن سے مسلم لیگ (ن) کے امیدوار کامیاب ہوئے ہیں اور انہیں پورا یقین ہے کہ ریاست میں اگلی حکومت مسلم لیگ (ن) ہی بنائے گی۔ عطا تارڑ نے کہا کہ سازشی عناصر بلاجواز سوالات اٹھا رہے ہیں لیکن عوام ان کے عزائم کو اچھے طریقے سے سمجھتے ہیں۔ انہوں نے مزید کہا کہ وزیراعظم شہباز شریف نے اقوامِ متحدہ سمیت ہر عالمی فورم پر مسئلہ کشمیر کا مقدمہ بھرپور انداز میں پیش کیا ہے، جبکہ خدمت اور کارکردگی کی بنیاد پر مسلم لیگ (ن) کا کوئی مقابلہ نہیں کر سکتا۔