مستونگ ہائی وے پر مسلح افراد کا حملہ، بلوچستان سیشن جج عبدالحکیم کاکڑ گن مین سمیت شہید

بلوچستان کے ضلع مستونگ میں ولی خان بائی پاس کے قریب مسلح افراد نے ججوں کی گاڑی پر فائرنگ کر دی، جس کے نتیجے میں سیشن جج عبدالحکیم کاکڑ اور ان کا گن مین موقع پر ہی شہید ہو گئے، جبکہ ایڈیشنل سیشن جج طارق لاشاری شدید زخمی ہو گئے۔ ایس ایچ او تھانہ مستونگ کے مطابق دونوں جج صاحبان کوئٹہ سے سیشن کورٹ مستونگ جا رہے تھے کہ راستے میں نامعلوم مسلح افراد نے ان کی گاڑی کو نشانہ بنایا۔

حملے کے فوری بعد زخمی ایڈیشنل سیشن جج طارق لاشاری کو طبی امداد کے لیے فوری طور پر ہسپتال منتقل کر دیا گیا ہے۔ واقعے کی اطلاع ملتے ہی قانون نافذ کرنے والے اداروں نے علاقے کو گھیرے میں لے کر ملزمان کی گرفتاری کے لیے سرچ آپریشن شروع کر دیا ہے، جبکہ پولیس کا کہنا ہے کہ واقعے کی مختلف پہلوؤں سے تحقیقات جاری ہیں۔