سینیٹ کی قائمہ کمیٹی برائے دفاع کا اجلاس، دفاعی و ہوابازی امور پر اہم بریفنگ

سینیٹر طلحہ محمود کی زیرِ صدارت سینیٹ کی قائمہ کمیٹی برائے دفاع کا اجلاس منعقد ہوا، جس میں سیکریٹری دفاع لیفٹیننٹ جنرل (ر) محمد علی نے کمیٹی کو اہم امور پر بریفنگ دی۔

اجلاس میں پاکستان اور سعودی عرب کے درمیان دفاعی معاہدے سے متعلق ایجنڈا ان کیمرہ کرنے کا فیصلہ کیا گیا، جبکہ پاک افغان سرحد کی موجودہ صورتحال پر دی جانے والی بریفنگ بھی ان کیمرہ رکھنے کا فیصلہ ہوا۔

سیکریٹری دفاع نے کمیٹی کو پی آئی اے کی نجکاری اور مالی صورتحال سے متعلق آگاہ کرتے ہوئے بتایا کہ آئندہ 15 ماہ کے دوران پی آئی اے میں 125 ارب روپے کی سرمایہ کاری کی جائے گی۔ ان کا کہنا تھا کہ ایئرکرافٹس اور وسائل کی کمی پی آئی اے کو درپیش سب سے بڑا مسئلہ ہے، تاہم امریکہ کے روٹس کے بھی جلد دوبارہ کھلنے کا امکان ہے۔

اجلاس میں چترال میں پی آئی اے کی فلائٹ آپریشن معطلی کی وجوہات پر بھی بریفنگ دی گئی۔ ایڈیشنل سیکریٹری وزارت دفاع نے بتایا کہ چترال کے لیے پی آئی اے کا فلائٹ آپریشن مسلسل خسارے کا شکار تھا، اسی باعث اسے معطل کیا گیا۔ بریفنگ میں کہا گیا کہ نجکاری کے بعد چترال کے لیے فلائٹس کی بحالی کی امید ہے۔

سیکریٹری دفاع نے کہا کہ چترال میں سیاحت کا فروغ فلائٹ آپریشن کی بحالی میں اہم کردار ادا کر سکتا ہے، اس کے لیے وزارت دفاع اور سیاحت سے متعلق اداروں کو مل کر کام کرنے کی ضرورت ہے۔ ان کا کہنا تھا کہ سیاحت میں اضافہ پی آئی اے کے آپریشنز میں وسعت کا سبب بنے گا۔

انہوں نے مزید بتایا کہ حکومت نے شہریوں کو چارٹر ہیلی کاپٹر سروس فراہم کرنے کی ہدایت جاری کی ہے، جبکہ گلگت بلتستان حکومت کے ساتھ مل کر ہیلی پورٹس کی تعمیر پر بھی کام کیا جائے گا۔

اجلاس میں دفاع، ہوابازی اور سیاحت سے متعلق امور پر تفصیلی تبادلہ خیال کیا گیا اور مستقبل میں مربوط حکمت عملی اپنانے پر زور دیا گیا۔