قائداعظم کے افکار آج بھی قومی چیلنجز کے حل کی رہنمائی کرتے ہیں، سہیل آفریدی

قائداعظم محمد علی جناح کے یومِ ولادت کے موقع پر وزیراعلیٰ خیبر پختونخوا سہیل آفریدی نے کہا ہے کہ قائداعظم کے افکار آج کے قومی چیلنجز کے تناظر میں بھی مکمل رہنمائی فراہم کرتے ہیں۔

اپنے پیغام میں وزیراعلیٰ نے کہا کہ ایمان، اتحاد اور تنظیم محض نعرے نہیں بلکہ ایک مؤثر، منصفانہ اور مضبوط طرزِ حکمرانی کی بنیاد ہیں۔ ان کا کہنا تھا کہ نظریۂ پاکستان ایک ایسی ریاست کا تقاضا کرتا ہے جو انصاف، خودداری اور عوامی فلاح پر قائم ہو۔

سہیل آفریدی نے کہا کہ عمران خان نے نظریۂ پاکستان کو فلاحی ریاست کے عملی تصور سے جوڑا اور ان کی سیاست کا محور قائداعظم کا تصورِ ریاست اور قومی خودمختاری ہے۔ انہوں نے واضح کیا کہ پاکستان کی نظریاتی بنیادوں کا تحفظ ہی قومی استحکام کی ضمانت ہے۔

وزیراعلیٰ نے بھارت کی انتہا پسند سوچ کا حوالہ دیتے ہوئے کہا کہ اس سے ثابت ہوتا ہے کہ قیامِ پاکستان ایک ناگزیر تاریخی فیصلہ تھا، جبکہ بھارت میں اقلیتوں خصوصاً مسلمانوں پر مظالم عالمی ضمیر کے لیے سوالیہ نشان ہیں۔

انہوں نے مزید کہا کہ خیبر پختونخوا حکومت قائداعظم کے اصولوں کو عملی حکمرانی کا حصہ بنا رہی ہے، جہاں شفافیت، میرٹ اور عوامی فلاح کو اولین ترجیح حاصل ہے۔ ان کے مطابق قانون کی بالادستی، میرٹ اور سماجی انصاف کے بغیر کوئی ریاست مضبوط نہیں ہو سکتی۔