وزیراعظم سے چینی کمپنی کے وفد کی ملاقات، غذائی تحفظ کے منصوبوں پر تبادلہ خیال

وزیراعظم محمد شہباز شریف سے چین کی معروف زرعی اور فوڈ پروسیسنگ کمپنی ‘فیمسن’ کے سی ای او جیک چین کی قیادت میں ایک اعلیٰ سطحی وفد نے ملاقات کی، جس میں پاکستان میں غذائی تحفظ، فوڈ اسٹوریج اور جدید زرعی ٹیکنالوجی کے فروغ پر تفصیلی تبادلہ خیال کیا گیا۔ وزیراعظم نے فیمسن کی جانب سے ملک میں اجناس کو ذخیرہ کرنے کے روایتی مراکز کو جدید ‘اسٹیٹ آف دی آرٹ’ مراکز اور ‘گرین سائلوز’ میں تبدیل کرنے کے منصوبے کا خیرمقدم کرتے ہوئے مقامی افرادی قوت کی فنی تربیت پر زور دیا۔ جیک چین نے بتایا کہ یہ پیشرفت وزیراعظم کے حالیہ دورۂ چین کا تسلسل ہے جس کا مقصد غذائی تحفظ کے قابلِ عمل منصوبوں پر کام شروع کرنا ہے۔ بریفنگ میں بتایا گیا کہ فیمسن جدید گرین سائلوز کے لیے ایک ڈیمانسٹریشن سینٹر قائم کرے گی، جبکہ اس سلسلے میں کمپنی اور ‘گرین پاکستان انیشی ایٹو’ کے درمیان مفاہمتی یادداشت (ایم او یو) پر پہلے ہی دستخط ہو چکے ہیں۔ اس اہم ملاقات میں وفاقی وزراء رانا تنویر حسین، جام کمال خان اور دیگر اعلیٰ حکام بھی موجود تھے