بجٹ 2026-27: تنخواہ دار طبقے پر ٹیکس بوجھ کم کرنے کی سفارش

فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) نے حکومت کو بجٹ 2026-27 کے لیے مختلف مالیاتی تجاویز ارسال کر دی ہیں، جن میں تنخواہ دار طبقے پر ٹیکس بوجھ کم کرنے پر زور دیا گیا ہے۔

بجٹ تجاویز میں کہا گیا ہے کہ تنخواہ دار طبقے کے لیے انکم ٹیکس کی بلند ترین شرح 35 فیصد سے کم کر کے 30 فیصد کی جائے تاکہ متوسط طبقے کو ریلیف فراہم کیا جا سکے۔

ایف پی سی سی آئی نے تنخواہ دار طبقے پر عائد 9 فیصد سرچارج ختم کرنے کی تجویز بھی دی ہے۔

تنظیم کی جانب سے سپر ٹیکس کے مکمل خاتمے کا مطالبہ کرتے ہوئے برآمدات کے فروغ کے لیے گڈز ٹرانسپورٹ کے شعبے میں فائنل ٹیکس نظام بحال کرنے کی سفارش کی گئی ہے۔

تجاویز میں یہ بھی کہا گیا ہے کہ معلوماتی ٹیکنالوجی شعبے پر 25 فیصد برآمدی ٹیکس کی موجودہ شرح 2035 تک برقرار رکھی جائے، جبکہ چھوٹے اور درمیانے کاروبار کے لیے ٹرن اوور کی حد 25 کروڑ سے بڑھا کر 50 کروڑ کی جائے۔

اسی طرح مینوفیکچرنگ شعبے کے لیے انکم ٹیکس کی شرح 29 فیصد سے کم کر کے 20 فیصد کرنے کی سفارش بھی بجٹ تجاویز کا حصہ ہے۔