آبنائے ہرمز صرف ایرانی انتظامات کے تحت ہی کھلے گی: باقر قالیباف

ایران کے پارلیمانی اسپیکر و چیف مذاکرات کار محمد باقر قالیباف نے امریکہ کو سخت خبردار کرتے ہوئے کہا ہے کہ آبنائے ہرمز صرف ایرانی انتظامات کے تحت ہی کھلے گی اور امریکی دھمکیاں اس اہم آبی گزرگاہ کے مستقبل کا فیصلہ نہیں کر سکتیں۔ سوشل میڈیا پلیٹ فارم ‘ایکس’ پر جاری اپنے بیان میں انہوں نے کہا کہ اگر امریکہ حملہ کرے گا تو اسے بھرپور جواب ملے گا، وہ فضول ہاتھ پاؤں مار کر خود کو مزید دلدل میں نہ دھکیلے۔ دوسری جانب امریکی صدر ڈونلڈ ٹرمپ نے دعویٰ کیا ہے کہ ایران نے معاہدے کی خواہش کے ساتھ رابطہ کیا ہے، تاہم انہوں نے انتباہ کیا کہ اگر ایران نے حملہ کیا تو بیس گنا زیادہ طاقت سے جواب دیا جائے گا۔ اس دوران ایرانی پارلیمانی قومی سلامتی کمیشن کے ترجمان ابراہیم رضائی نے انتہائی سخت مؤقف اپناتے ہوئے کہا کہ ایران کا خلاف ساتھ دینے والے خلیجی ممالک اپنے تیل اور گیس کے کنوؤں کی حفاظت کریں کیونکہ اب کوئی بھی امریکی فوجی زندہ واپس نہیں جائے گا۔ علاوہ ازیں، ایرانی وزارتِ خارجہ کے ترجمان اسماعیل بقائی نے امریکہ پر مفاہمتی یادداشت کی پانچویں شق کو پامال کرنے کا الزام عائد کرتے ہوئے واضح کیا کہ آبنائے ہرمز میں محفوظ جہاز رانی کی ذمہ داری صرف ایران کی ہے اور وہ اپنی خودمختاری کا ہر قیمت پر دفاع کرے گا۔