ایران کا امریکا کو دوٹوک پیغام، حملہ کیا تو بھرپور جواب ملے گا: قالیباف

ایران کی پارلیمنٹ کے اسپیکر محمد باقر قالیباف نے امریکا کو سخت انتباہ جاری کرتے ہوئے کہا ہے کہ اب دھونس، دھمکیوں اور وعدہ خلافی کی کوئی بھی کارروائی بغیر جواب کے نہیں رہے گی؛ اگر امریکا حملہ کرے گا تو جواب میں اس پر بھی حملہ ہوگا۔ سوشل میڈیا پلیٹ فارم ‘ایکس’ پر جاری اپنے بیان میں انہوں نے آبنائے ہرمز پر امریکی دباؤ کو مسترد کرتے ہوئے واضح کیا کہ یہ اہم بحری گزرگاہ امریکی دھمکیوں سے نہیں بلکہ صرف ایرانی انتظامات کے تحت ہی کھلے گی۔ قالیباف نے امریکا کو خبردار کیا کہ وہ بے مقصد ہاتھ پاؤں مارنے سے گریز کرے ورنہ مزید دلدل میں دھنستا چلا جائے گا۔ ایرانی اسپیکر کا یہ بیان ایک ایسے وقت میں سامنے آیا ہے جب بندرعباس سمیت مختلف ایرانی شہروں پر امریکی حملوں کے باعث خطے میں کشیدگی عروج پر ہے، جن میں ایک ریلوے پل کو نشانہ بنانے کے ساتھ ساتھ ایک فائر فائٹر بھی جاں بحق ہو چکا ہے۔