کچھ دیر پہلے ایران کی جانب معاہدے کیلئے رابطہ کیا گیا، ڈونلڈ ٹرمپ کا دعویٰ

امریکی صدر ڈونلڈ ٹرمپ نے دعویٰ کیا ہے کہ کچھ دیر پہلے ایران کی جانب سے رابطہ کیا گیا ہے، تاہم انہوں نے واضح کیا کہ ایران جب بھی حملہ کرے گا، امریکہ جواب میں 20 گنا زیادہ بڑا حملہ کرے گا۔ اپنے طیارے ‘ایئر فورس ون’ میں صحافیوں سے گفتگو کرتے ہوئے ڈونلڈ ٹرمپ نے کہا کہ ایرانی حکام معاہدہ کرنے کے شدید خواہش مند ہیں اور انہوں نے رابطہ بھی کیا ہے، لیکن وہ نہیں جانتے کہ ایران معاہدہ کرنے کے لیے قابلِ اعتماد ہے یا نہیں۔ ایران پر حالیہ امریکی کارروائیوں سے متعلق انہوں نے بتایا کہ یہ حملے آبنائے ہرمز میں تجارتی جہازوں پر ایرانی حملوں کے جواب میں کیے گئے ہیں اور امریکہ اپنے فوجی اہداف پہلے ہی حاصل کر چکا ہے۔ جب صدر ٹرمپ سے سوال کیا گیا کہ کیا یہ تنازع اب ایک مکمل جنگ میں تبدیل ہو چکا ہے؟ تو ان کا کہنا تھا کہ وہ اس بارے میں یقین سے نہیں کہہ سکتے، لیکن حالیہ سخت جواب کے بعد ایران نے ایک بار پھر معاہدے کی خواہش ظاہر کی ہے۔