محسن نقوی کی یو این سیکرٹری جنرل سے ملاقات، علاقائی صورتحال پر تبادلہ خیال

وفاقی وزیر داخلہ محسن نقوی نے اقوام متحدہ کے ہیڈ کوارٹرز میں اقوام متحدہ کے سیکرٹری جنرل انتونیو گوتریس سے ایک اہم ملاقات کی، جس میں علاقائی صورتحال اور بین الاقوامی امور پر تفصیلی تبادلہ خیال کیا گیا۔ ملاقات کے دوران مغربی ایشیا میں تنازعات کے خاتمے کے لیے پاکستان کی ثالثی کی کوششوں اور اقوام متحدہ کے امن مشنز میں پاکستانی افواج کی لازوال خدمات پر بات چیت کی گئی۔ اس موقع پر وزیر داخلہ محسن نقوی کا کہنا تھا کہ مشکل چیلنجز کے باوجود پاکستان نے علاقائی امن و استحکام کے فروغ اور انسانی جانوں کے تحفظ کے لیے ہمیشہ ذمہ دارانہ کردار ادا کیا ہے۔ انہوں نے مزید زور دیا کہ امن مشنز کی کامیابی کے لیے انہیں حقیقت پسندانہ مینڈیٹ اور درکار وسائل کی فراہمی انتہائی ضروری ہے۔ اقوام متحدہ کے سیکرٹری جنرل انتونیو گوتریس نے عالمی امن اور سلامتی کو برقرار رکھنے کے لیے پاکستان کے طویل المدتی اور پائیدار تعاون کا شکریہ ادا کرتے ہوئے پاکستانی کاوشوں کو دل کھول کر سراہا۔