فارن فنڈنگ کیس: چالان کی اسکروٹنی مکمل، بانی پی ٹی آئی و دیگر کے خلاف سماعت 7 ستمبر تک ملتوی

اسلام آباد: بینکنگ کورٹ اسلام آباد میں بانی پی ٹی آئی اور دیگر نامزد ملزمان کے خلاف دائر فارن فنڈنگ کیس کی سماعت ہوئی، جس کے دوران مقدمے کے چالان کی اسکروٹنی کا عمل مکمل کر لیا گیا ہے۔

تفصیلات کے مطابق بینکنگ کورٹ کے جج عبدالغفور کاکڑ نے کیس پر باقاعدہ سماعت کی۔ سماعت کے دوران وفاقی تحقیقاتی ادارے (ایف آئی اے) کی جانب سے اسپیشل پراسیکیوٹر واثق ملک عدالت کے روبرو پیش ہوئے اور چالان کے حوالے سے قانونی چارہ جوئی پر بریفنگ دی۔

وفاقی تحقیقاتی ادارے (FIA) نے بانی پی ٹی آئی اور دیگر متعلقہ ملزمان کے خلاف ممنوعہ غیر ملکی فنڈنگ حاصل کرنے کے الزامات کے تحت یہ مقدمہ درج کر رکھا ہے، جس کی تحقیقات طویل عرصے سے جاری ہیں۔ آج کی سماعت کے دوران چالان کی اسکروٹنی کا اہم مرحلہ مکمل ہونے کے بعد عدالت نے فارن فنڈنگ کیس کی مزید کارروائی کو 7 ستمبر تک کے لیے ملتوی کر دیا ہے۔

اگلی سماعت پر ملزمان کو چالان کی نقول کی فراہمی اور فردِ جرم کے حوالے سے اہم پیش رفت متوقع ہے۔