مذاکرات ہی ہر مسئلے کا حل ہیں، راجہ پرویز اشرف

لاہور میں میڈیا سے گفتگو کرتے ہوئے سابق وزیراعظم اور پیپلز پارٹی کے رہنما راجہ پرویز اشرف نے کہا ہے کہ ہم صرف پی آئی اے کے ملازمین کے روزگار اور حقوق کا تحفظ یقینی بنانا چاہتے ہیں، اگر ان کے روزگار کا تحفظ ہو رہا ہے تو نجکاری پر کوئی اعتراض نہیں۔

انہوں نے کہا کہ وزیراعظم کی جانب سے مذاکرات کی دعوت ایک احسن اقدام ہے اور ہر مسئلے کا حل صرف مذاکرات میں ہے۔ راجہ پرویز اشرف نے پاکستان تحریک انصاف کو مخاطب کرتے ہوئے کہا کہ ملکی مفاد میں مذاکرات کا راستہ اپنائیں اور کوئی ایسا طرزِعمل اختیار نہ کریں جس سے ملکی سالمیت کو خطرہ ہو یا ملک بدنامی اور افراتفری کا شکار ہو۔

ان کا کہنا تھا کہ پاکستانی افواج نے جو کامیابیاں حاصل کی ہیں، ان کے پیچھے چٹان کی طرح کھڑے ہونے کی ضرورت ہے۔ انہوں نے کہا کہ ہر معاملے کو مثبت انداز میں دیکھنا چاہیے جب تک وہ اس کے برعکس ثابت نہ ہو جائے۔

راجہ پرویز اشرف نے کہا کہ پنجاب میں پیپلز پارٹی کا دوبارہ احیاء ہوا ہے اور پیپلز پارٹی ہر جگہ موجود بھی ہے اور مقبول بھی۔ ان کے مطابق پیپلز پارٹی ہی وہ جماعت ہے جو ملک کو موجودہ بحران سے نکال سکتی ہے، ہم تمام سیاسی جماعتوں کا احترام کرتے ہیں مگر اس وقت واحد حل پیپلز پارٹی ہے۔

انہوں نے مزید کہا کہ حکومت کو خود بزنس نہیں کرنا چاہیے بلکہ ایسی فضا پیدا کرنی چاہیے جس میں کاروبار فروغ پا سکے۔