نیشنل ڈائیلاگ کمیٹی وفد کی پیر پگارا سے اہم ملاقات، سیاسی صورتحال پر تفصیلی مشاورت

نیشنل ڈائیلاگ کمیٹی کے وفد نے راجہ ہاؤس میں پیر پگارا سے اہم ملاقات کی جس میں ملک کی مجموعی سیاسی صورتحال اور اپوزیشن اتحاد سے متعلق تفصیلی تبادلۂ خیال کیا گیا۔

ملاقات میں عمران اسماعیل، فواد چوہدری اور محمود مولوی شریک ہوئے۔ وفد نے اس موقع پر مؤقف اختیار کیا کہ ملک میں دو سے تین سال کے لیے قومی حکومت کے قیام پر غور کیا جانا چاہیے تاکہ موجودہ سیاسی و معاشی بحران سے نکلنے کا راستہ نکالا جا سکے۔

وفد نے کہا کہ تمام اہم ملکی مسائل کا حل علاقائی نمائندگی کو پس منظر میں رکھتے ہوئے قومی مفاد کو ترجیح دینے میں ہے۔ اس کے ساتھ مضبوط اپوزیشن اتحاد کو وقت کی اہم ضرورت قرار دیا گیا۔

ذرائع کے مطابق وفد نے پیر پگارا سے اپیل کی کہ وہ اس عمل میں اپنا کردار ادا کریں۔ ملاقات میں اس بات پر بھی اتفاق کیا گیا کہ جلد مزید سیاسی جماعتوں سے رابطے کیے جائیں گے۔

پیر پگارا نے کہا کہ مولانا فضل الرحمان سمیت مختلف اپوزیشن جماعتیں مؤثر اتحاد کے قیام پر متفق ہیں، تاہم کوئی ایک یا دو جماعتیں اکیلے ملکی مسائل کا حل نہیں نکال سکتیں۔

ملاقات میں سندھ کی سیاسی، معاشی اور امن و امان کی صورتحال پر بھی تفصیلی گفتگو ہوئی جبکہ گورننس، عوامی مسائل اور سیاسی استحکام پر تبادلۂ خیال کیا گیا۔

فریقین نے قومی ہم آہنگی اور اتفاقِ رائے کی ضرورت پر زور دیتے ہوئے باہمی مشاورت جاری رکھنے پر اتفاق کیا۔ سندھ کو درپیش چیلنجز کے حل کے لیے مشترکہ کوششوں کی اہمیت بھی اجاگر کی گئی۔

ملاقات میں بیرسٹر سیف، شہزاد وسیم، محمد علی درانی اور عباس جعفری بھی شریک تھے۔