امریکا اور ایران آبنائے ہرمز میں محفوظ جہاز رانی یقینی بنائیں: چین

چین نے امریکہ اور ایران کے درمیان جاری حالیہ فوجی کشیدگی پر گہری تشویش کا اظہار کرتے ہوئے آبنائے ہرمز میں محفوظ اور آزادانہ جہاز رانی کو جلد از جلد بحال کرنے کا مطالبہ کر دیا ہے۔ بیجنگ میں ایک پریس بریفنگ کے دوران چینی وزارتِ خارجہ کے ترجمان لین جیان نے کہا کہ خلیجی خطے میں بڑھتی ہوئی کشیدگی عالمی تجارتی تحفظ کے لیے خطرہ ہے، اس لیے تمام متعلقہ فریقین کو فوری طور پر تحمل کا مظاہرہ کرتے ہوئے جنگ بندی کو برقرار رکھنا چاہیے۔ انہوں نے خبردار کیا کہ کسی بھی نئی عسکری محاذ آرائی کے نتیجے میں بے گناہ شہریوں کو شدید نقصان پہنچ سکتا ہے۔ ترجمان نے اس بات پر زور دیا کہ آبنائے ہرمز سے ملحقہ ممالک کے جائز حقوق اور مفادات کا ہر صورت احترام کیا جانا چاہیے، کیونکہ اس اہم گزرگاہ میں بحری آمدورفت کا تحفظ عالمی برادری کی مشترکہ خواہش ہے۔ چینی وزارتِ خارجہ نے تمام فریقین پر زور دیا ہے کہ وہ طاقت کے استعمال کے بجائے مذاکرات اور سفارتی تعاون کے ذریعے اس تنازع کا پرامن حل تلاش کریں۔