پاکستان اور امریکا کا انسدادِ دہشتگردی، سائبر سکیورٹی تعاون بڑھانے پر اتفاق

وفاقی وزیرِ داخلہ محسن نقوی نے واشنگٹن میں امریکی وفاقی تحقیقاتی ادارے (ایف بی آئی) کے ڈائریکٹر کاش پٹیل سے ملاقات کی، جس میں انسدادِ دہشت گردی، سائبر کرائم سے نمٹنے اور دونوں ممالک کے سکیورٹی اداروں کے درمیان تعاون بڑھانے کے امور پر تفصیلی تبادلہ خیال کیا گیا۔ سماجی رابطے کی ویب سائٹ ‘ایکس’ پر جاری اپنے ایک بیان میں وزیرِ داخلہ نے اس ملاقات کو انتہائی خوشگوار اور تعمیری قرار دیتے ہوئے کہا کہ گفتگو کے دوران غیر قانونی امیگریشن، انسدادِ دہشت گردی اور آفیسرز ایکسچینج جیسے تربیتی پروگراموں سمیت سائبر تحقیقات کے لیے جدید وسائل اور تکنیکی معاونت کی فراہمی پر بات چیت کی گئی۔ انہوں نے ایف بی آئی کے ڈائریکٹر کاش پٹیل کی پیشہ ورانہ صلاحیتوں کو سراہتے ہوئے انہیں پاکستان کے لیے ایک مؤثر اور تعمیری شراکت دار قرار دیا۔ دوسری جانب، ایف بی آئی کے ڈائریکٹر کاش پٹیل نے بھی پاکستان کے ساتھ شراکت داری کو انتہائی اہم قرار دیتے ہوئے کہا کہ ایف بی آئی خطے میں امریکی مفادات کے تحفظ اور دہشت گردی کی مالی معاونت کو روکنے کے لیے پاکستان کے تعاون کو قدر کی نگاہ سے دیکھتی ہے۔