پاکستان اور جنوبی افریقہ ویمنز انڈر 19 کا پہلا ٹی 20 میچ آج ہوگا

پاکستان اور جنوبی افریقہ کی ویمنز انڈر 19 کرکٹ ٹیموں کے درمیان پانچ میچوں پر مشتمل ٹی 20 سیریز کا پہلا معرکہ آج کراچی میں سجے گا، جہاں دونوں ٹیمیں فتح کے عزم کے ساتھ میدان میں اتریں گی۔ یہ میچ پاکستانی وقت کے مطابق شام 7 بجے شروع ہوگا۔ گزشتہ روز دونوں ٹیموں کی کپتانوں نے سیریز کی خوبصورت ٹرافی کی رونمائی بھی کی تھی۔ اس موقع پر میڈیا سے گفتگو کرتے ہوئے پاکستانی کپتان فضا فیاض نے کہا کہ نوجوان کھلاڑیوں کے لیے یہ سیریز اپنی صلاحیتیں منوانے کا بہترین موقع ہے اور وہ اچھے نتائج دینے کے لیے پرعزم ہیں۔ دوسری جانب، مہمان ٹیم کی کپتان میکا فین فارسٹ نے پاکستان آمد پر خوشی کا اظہار کرتے ہوئے دلچسپ گفتگو کی اور کہا کہ اگر انہیں موقع ملا تو وہ پاکستان کے مایہ ناز بلے باز بابر اعظم اور اسٹار فاسٹ بولر شاہین شاہ آفریدی سے ملنا پسند کریں گی۔