کیش لیس معیشت سے شفافیت اور پائیدار معاشی ترقی کو فروغ ملے گا، وزیراعظم

وزیرِ اعظم شہباز شریف نے کہا ہے کہ ملکی معیشت کو ڈیجیٹل ادائیگیوں پر مبنی کیش لیس نظام میں منتقل کرنے سے پائیدار معاشی ترقی، شفافیت اور مالیاتی نظام کی بہتری کو فروغ ملے گا۔ اسلام آباد میں وزیرِ اعظم کی زیرِ صدارت منعقدہ جائزہ اجلاس میں بتایا گیا کہ جون 2025 سے جون 2026 کے دوران ڈیجیٹل ادائیگیاں وصول کرنے والے فعال مرچنٹس کی تعداد 300 فیصد اضافے کے ساتھ 20 لاکھ 3 ہزار تک پہنچ گئی ہے، جبکہ ملک میں موبائل بینکنگ ایپ استعمال کرنے والے صارفین کی تعداد 13 کروڑ 70 لاکھ سے تجاوز کر چکی ہے۔ بریفنگ کے مطابق، نادرا کی 99 فیصد ادائیگیاں اب ڈیجیٹل ہو چکی ہیں اور نقد ادائیگیوں کا تناسب 71 فیصد سے کم ہو کر صرف ایک فیصد رہ گیا ہے، جبکہ بے نظیر انکم سپورٹ پروگرام کے ایک کروڑ مستحقین کو تمام ادائیگیاں ڈیجیٹل والٹ کے ذریعے فراہم کی جا رہی ہیں۔ وزیرِ اعظم نے معاشی ٹیم کی کارکردگی کو سراہتے ہوئے بیرونِ ملک سے آنے والی ترسیلاتِ زر کو 100 فیصد ڈیجیٹل بنانے کی ہدایت جاری کی اور بتایا کہ تھرڈ پارٹی ویلیڈیشن کی حتمی رپورٹ نومبر 2026 میں پیش کی جائے گی۔