کراچی میں رینجرز کیمپ پر حملے کا ماسٹر مائنڈ قاری بشیر گرفتار

کراچی میں سکیورٹی فورسز نے رینجرز کیمپ پر حملے میں ملوث سہولت کاروں کے نیٹ ورک کو بے نقاب کرتے ہوئے واقعے کے ماسٹر مائنڈ قاری بشیر کو گرفتار کر لیا ہے۔ وزیرِ داخلہ سندھ ضیا الحسن لنجار نے ایڈیشنل آئی جی سی ٹی ڈی ذوالفقار لاڑک اور ایس ایس پی سی ٹی ڈی عرفان بہادر کے ہمراہ پریس کانفرنس کرتے ہوئے بتایا کہ 27 جون کو سندھ رینجرز کی کراچی ٹرانسپورٹ کمپنی پر چار دہشت گردوں نے حملہ کیا تھا، جن میں سے تین کا تعلق افغانستان جبکہ ایک کا باجوڑ سے تھا جو 20 برس افغانستان میں مقیم رہا۔ صوبائی وزیرِ داخلہ کے مطابق، دہشت گردوں کے تمام ہینڈلرز افغانستان سے انہیں ہدایات فراہم کر رہے تھے اور ان کا مقصد لوگوں کو یرغمال بنا کر بڑے پیمانے پر جانی نقصان پہنچانا تھا، تاہم رینجرز نے بروقت کارروائی کرتے ہوئے تین دہشت گردوں کو ہلاک اور ایک کو زخمی حالت میں گرفتار کر کے دشمن کے ناپاک عزائم خاک میں ملا دیے۔ ایس ایس پی سی ٹی ڈی عرفان بہادر نے حملے کی تفصیلات بتاتے ہوئے کہا کہ اس کارروائی کو چار مراحل یعنی افغانستان میں منصوبہ بندی، پاکستان منتقلی، مقامی سہولت کاری، اور اسلحہ و خودکش جیکٹس کی فراہمی میں تقسیم کیا گیا تھا۔