مریم نواز سنٹر آف اکیڈمک لیڈر شپ پائلٹ پراجیکٹ کی منظوری

وزیراعلیٰ پنجاب مریم نواز شریف نے صوبے میں تعلیمی شعبے کی اپ گریڈیشن کے لیے ایک بڑے انقلابی اقدام کے تحت “مریم نواز سنٹر آف اکیڈمک لیڈرشپ” پائلٹ پروجیکٹ کی باقاعدہ منظوری دے دی ہے۔ وزیراعلیٰ پنجاب کی زیر صدارت منعقدہ ایک اعلیٰ سطح کے اجلاس میں پنجاب بھر میں نامور تعلیمی ادارے “ایچی سن کالج” کے معیار کے بوائز اور گرلز اسکول قائم کرنے کا بھی اصولی فیصلہ کیا گیا ہے۔ منصوبے کے پہلے مرحلے کے تحت لاہور کے وحدت روڈ پر طلبہ اور طالبات کے لیے الگ الگ مریم نواز سنٹر آف اکیڈمک لیڈرشپ قائم کیے جائیں گے، جہاں جدید اسپورٹس ہال، ہاکی اور کرکٹ اسٹیڈیم، سوئمنگ پول اور گھڑ سواری جیسی عالمی معیار کی تعلیمی و کھیلوں کی سہولیات فراہم کی جائیں گی۔ بریفنگ میں بتایا گیا کہ پائلٹ پروجیکٹ کے ان مراکز میں 5,000 طلبہ اور 5,000 طالبات کو داخلہ دیا جائے گا تاکہ انہیں بہترین ماحول میں مستقبل کی قیادت کے لیے تیار کیا جا سکے۔