محمد رضوان کی آئی سی سی سے اینٹی کرپشن کارروائی سے متعلق رہنمائی کی درخواست

پاکستان کرکٹ ٹیم کے سینئر وکٹ کیپر بیٹر محمد رضوان نے انٹرنیشنل کرکٹ کونسل (آئی سی سی) کے اینٹی کرپشن یونٹ سے باضابطہ رابطہ قائم کرتے ہوئے ڈریسنگ روم سے موبائل فون قبضے میں لیے جانے اور اینٹی کرپشن کارروائی سے متعلق جامع قانونی و آئینی رہنمائی کی درخواست کر دی ہے۔ محمد رضوان نے آئی سی سی اینٹی کرپشن یونٹ کے آفیشل پورٹل پر جا کر آن لائن درخواست جمع کرائی، جس میں انہوں نے سوال اٹھایا ہے کہ کیا انگلینڈ اینڈ ویلز کرکٹ بورڈ (ای سی بی) کے اینٹی کرپشن یونٹ کی اس تمام کارروائی سے آئی سی سی مکمل طور پر آگاہ یا اس میں براہِ راست شامل تھی؟

محمد رضوان نے اپنی درخواست میں آئی سی سی سے اہم سوالات کے جوابات مانگتے ہوئے دریافت کیا کہ کھلاڑی سے فون طلب کرنا اور پھر اس ڈیوائس کو برطانیہ سے پاکستان منتقل کرنا آئی سی سی کے اینٹی کرپشن کوڈ کے طے شدہ ضوابط کے مطابق تھا یا نہیں؟ انہوں نے فون کے فرانزک معائنے کے اختیار کیے گئے طریقہ کار پر بھی شفافیت کی وضاحت طلب کی ہے۔ وکٹ کیپر بیٹر نے واضح کیا کہ وہ کسی ادارے یا فرد کے خلاف کوئی باضابطہ شکایت درج نہیں کرا رہے بلکہ مستقبل کے لیے اپنی قانونی ذمہ داریوں، باہمی تعاون کے طریقہ کار اور اپنے بنیادی حقوق سے متعلق آئی سی سی کے موقف کی مکمل وضاحت چاہتے ہیں۔