اسحاق ڈار سے ترک سفیر، برطانوی ہائی کمشنر کی ملاقاتیں، علاقائی صورتحال پر مشاورت

نائب وزیراعظم و وزیرِ خارجہ سینیٹر محمد اسحاق ڈار سے ترکیہ کے سفیر عرفان نذیروغلو اور برطانوی ہائی کمشنر جین میریٹ نے الگ الگ اہم ملاقاتیں کی ہیں، جن میں دوطرفہ تعلقات کے فروغ، شعبہ جات میں تعاون کو وسعت دینے اور علاقائی و عالمی صورتحال پر تفصیلی تبادلہ خیال کیا گیا۔ دفترِ خارجہ کے ترجمان کے مطابق ان ملاقاتوں میں خطے میں پائیدار امن کے قیام کے لیے سفارتی کوششوں کی اہمیت پر زور دیا گیا۔

ترک سفیر عرفان سے گفتگو کرتے ہوئے نائب وزیراعظم اسحاق ڈار نے کہا کہ موجودہ علاقائی و عالمی چیلنجز اور درپیش مسائل کے حل کے لیے صرف مذاکرات اور سفارتکاری ہی واحد قابلِ عمل اور موثر راستہ ہیں۔ ملاقات کے دوران پاکستان اور ترکیہ کے درمیان دوطرفہ ادارہ جاتی میکنزمز اور اعلیٰ سطحی رابطوں کے نتائج کا جائزہ لیا گیا۔ اسحاق ڈار نے واضح کیا کہ پاکستان ترکیہ کے ساتھ ترجیحی شعبوں میں روابط کو مزید گہرا کرنے کا عزم رکھتا ہے اور ‘ہائی لیول اسٹریٹجک کوآپریشن کونسل’ کے آٹھویں اجلاس کی تیاریوں کے لیے دونوں ممالک کے متعلقہ اداروں کو قریبی رابطہ برقرار رکھنے کی ہدایت کی گئی ہے۔

قبل ازیں، برطانوی ہائی کمشنر جین میریٹ سے ہونے والی ملاقات میں نائب وزیراعظم نے اپنے حالیہ دورہِ برطانیہ کے دوران طے پانے والی اہم مفاہمتوں اور معاہدوں پر عملدرآمد کی پیش رفت پر گفتگو کی۔ ملاقات میں پاکستان اور برطانیہ کے مابین تجارتی، معاشی اور سفارتی شعبوں میں تعاون کو مزید مضبوط بنانے کے لیے نئے طریقوں پر غور کیا گیا۔ اسحاق ڈار نے اعلیٰ سطحی باہمی رابطوں کے تسلسل کی اہمیت پر زور دیا اور دونوں ممالک کے درمیان مشترکہ دلچسپی کے امور پر ہم آہنگی کو سراہا۔