بی این پی کے سینئر رہنما مرزا فخر الاسلام بنگلادیش کے نئے صدر منتخب

بنگلادیشی ارکانِ پارلیمنٹ نے حکمران جماعت بنگلادیش نیشنلسٹ پارٹی (بی این پی) کے سینئر رہنما مرزا فخر الاسلام عالمگیر کو ملک کا نیا صدر منتخب کر لیا ہے۔ اگرچہ صدارت کا عہدہ بڑی حد تک آئینی و رسمی ہے، تاہم وہ اب سربراہِ مملکت اور مسلح افواج کے کمانڈر انچیف کے فرائض انجام دیں گے، جبکہ انتظامی اختیارات بدستور وزیراعظم اور ان کی کابینہ کے پاس رہیں گے۔ 78 سالہ مرزا فخر الاسلام عالمگیر نے پارلیمانی ووٹنگ میں اپوزیشن اتحاد کے امیدوار ریٹائرڈ آرمی کرنل اولی احمد کو شکست دی۔

یہ صدارتی انتخاب سابق صدر محمد شہاب الدین کے گزشتہ ماہ خرابیِ صحت کی بنا پر قبل از وقت مستعفی ہونے کی وجہ سے عمل میں آیا۔ واضح رہے کہ سال 2024 میں شیخ حسینہ واجد کی حکومت کے خاتمے کے بعد بی این پی رواں سال اقتدار میں آئی تھی۔ مرزا فخر الاسلام عالمگیر 2016 سے اپنی نامزدگی تک بی این پی کے سیکرٹری جنرل کے طور پر خدمات انجام دے رہے تھے اور حسینہ واجد کے دور میں اپوزیشن کی ایک توانا آواز بن کر سامنے آئے، جس کی پاداش میں انہیں متعدد بار جیل اور مقدمات کا سامنا بھی کرنا پڑا۔