عمران خان کو شفا انٹرنیشنل منتقل کرنے کی تیاری، بہن ڈاکٹر عظمیٰ اور ذاتی معالج کی نگرانی میں طبی معائنہ مکمل

پاکستان تحریک انصاف (پی ٹی آئی) کے بانی اور سابق وزیراعظم عمران خان کو اڈیالہ جیل سے اسلام آباد کے شفا انٹرنیشنل ہسپتال منتقل کرنے کی تیاریاں حتمی مرحلے میں داخل ہو گئی ہیں۔ اس سلسلے میں وفاقی پولیس کو اعلیٰ سطح پر الرٹ کر دیا گیا ہے، جبکہ اڈیالہ جیل میں ان کی بہن ڈاکٹر عظمیٰ اور ذاتی معالج ڈاکٹر فیصل سلطان کی موجودگی میں طبی معائنہ مکمل کر لیا گیا ہے۔ بانی پی ٹی آئی کی آمد کے پیشِ نظر ہسپتال کے گرد و پیش میں سیکیورٹی کے انتہائی سخت انتظامات کیے جا رہے ہیں شفا انٹرنیشنل ہسپتال میں ماہر امراضِ قلب (Cardiologists)، جنرل میڈیسن کے ماہرین اور ماہر امراضِ چشم (Ophthalmologists) پر مشتمل خصوصی میڈیکل ٹیم تشکیل دی گئی ہے جو بانی پی ٹی آئی کے پہنچتے ہی ان کا تفصیلی طبی معائنہ کرے گی۔ذرائع کے مطابق شفا انٹرنیشنل ہسپتال کے ایک مخصوص حصے یا وارڈ کو باضابطہ طور پر ‘سب جیل’ قرار دینے کا فیصلہ کیا گیا ہے، جس کا باقاعدہ نوٹیفکیشن چیف کمشنر اسلام آباد کی جانب سے جاری کیا جائے گا۔انسپکٹر جنرل (آئی جی) اسلام آباد پولیس سمیت تمام اعلیٰ افسران نے شفا انٹرنیشنل ہسپتال کا دورہ کر کے سیکیورٹی کے انتظامات کا جائزہ لیا ہے۔ پولیس لائنز ہیڈ کوارٹر میں اضافی نفری کو کسی بھی ناہمواری سے نمٹنے کے لیے تیار رہنے کا حکم دیا گیا ہے

 اڈیالہ جیل کے گیٹ نمبر 5 کے باہر بانی پی ٹی آئی کی بہن علیمہ خان اور دیگر افراد موجود ہیں، جبکہ منتقلی کی کارروائی کے لیے حتمی سیکیورٹی کلیئرنس کا انتظار کیا جا رہا ہے۔