امریکا کا ایران کیساتھ کاروبار کرنے والے ممالک کیخلاف بھی سخت اقدامات کا اعلان

امریکی وزیر خزانہ سکاٹ بیسنٹ نے ایران پر تاریخ کی سخت ترین اقتصادی پابندیاں عائد کرنے کا اعلان کرتے ہوئے واضح کیا ہے کہ ایران سے تجارتی روابط رکھنے والے دیگر ممالک کو بھی امریکی کارروائیوں اور پابندیوں کا سامنا کرنا پڑے گا۔ امریکی میڈیا کو انٹرویو دیتے ہوئے ان کا کہنا تھا کہ اگلے ہفتے مزید اہم اعلانات توقع کے مطابق کیے جائیں گے کیونکہ امریکہ ایران کو معاشی طور پر مکمل تنہا کرنے جا رہا ہے۔ ان اقدامات کا بنیادی مقصد ایرانی حکومت کی خطے میں پراکسی کارروائیوں کو محدود کرنا اور معاشی دباؤ کے ذریعے موجودہ حکومت کو ختم کرنا ہے۔

امریکی وزیر خزانہ نے مزید بتایا کہ ان سخت ترین اقدامات میں معاشی دباؤ کے ساتھ ساتھ آبنائے ہرمز میں جاری ناکہ بندی بھی شامل ہوگی، جس کی مثال ماضی میں نہیں ملتی۔ انہوں نے تاکید کی کہ آبنائے ہرمز میں ناکہ بندی کا سلسلہ برقرار رہے گا جس کے باعث ایرانی بندرگاہوں سے کسی بھی قسم کی آمد و رفت یا تجارت ممکن نہیں رہے گی۔ سکاٹ بیسنٹ کا کہنا تھا کہ چین سمیت تمام عالمی ممالک آبنائے ہرمز کو دوبارہ کھلتا دیکھنا چاہتے ہیں، تاہم امریکہ اپنے معاشی و بحری دباؤ کے ذریعے ایران کو تنہا کرنے کی پالیسی جاری رکھے گا۔