ملک میں قانون کی حکمرانی اور مساوی مواقع کو یقینی بنانا ہوگا: اسحاق ڈار

نائب وزیراعظم و وزیرِ خارجہ اسحاق ڈار نے یومِ ولادت کے موقع پر مفکرِ پاکستان علامہ محمد اقبالؒ کو شاندار الفاظ میں خراجِ عقیدت پیش کرتے ہوئے کہا ہے کہ حکومت ایک ایسے پاکستان کی تعمیر کے لیے پرعزم ہے جہاں ہر شہری کو قانون کی حکمرانی، عدل اور ترقی کے مساوی مواقع میسر ہوں۔ اپنے خصوصی پیغام میں اسحاق ڈار نے کہا کہ علامہ اقبالؒ کے خطبہ الٰہ آباد اور افکار نے برصغیر کے مسلمانوں کی سیاسی بیداری اور خوددار قوم کی تشکیل میں فکری بنیادیں فراہم کیں، جبکہ ان کا فلسفہِ خودی اور تعلیم و تحقیق کی تاکید آج بھی قومی زندگی کا اصل سرچشمہ ہے۔ نائب وزیراعظم نے زور دیا کہ نوجوان علامہ اقبالؒ کی امیدوں کا مرکز تھے، اس لیے انہیں معیاری تعلیم اور ہنر سے آراستہ کرنا قومی ترقی کے لیے ناگزیر ہے۔ ان کا مزید کہنا تھا کہ پاکستان عالمی سطح پر امن، احترام اور اقوام کے حقِ خودارادیت کی حمایت جاری رکھے گا، اور فکرِ اقبالؒ کو عملی فیصلوں کا حصہ بنا کر ہی ملک کو معاشی طور پر مضبوط و خوشحال بنایا جا سکتا ہے۔