کیف چند گھنٹوں میں جنگ ختم کر سکتا ، فیصلہ یوکرین کے ہاتھ میں ہے: کریملن

کریملن کے ترجمان دیمتری پیسکوف نے کہا ہے کہ یوکرین میں جاری تنازع اور فوجی کارروائیاں چند گھنٹوں کے اندر ختم ہو سکتی ہیں، تاہم اس کا تمام تر انحصار کیف حکومت کے فیصلے پر ہے۔ انہوں نے واضح کیا کہ روسی وزارتِ خارجہ نے دو سال قبل ہی جنگ بندی کے لیے اپنی شرائط پیش کر دی تھیں، جو آج بھی اپنی جگہ قائم اور غیر مبہم ہیں۔

دیمتری پیسکوف کا کہنا تھا کہ اگر یوکرینی قيادت روس کی پیش کردہ شرائط کو تسلیم کرنے کا مناسب فیصلہ کر لے تو آج آدھی رات سے پہلے بھی تمام عسکری کارروائیاں روکی جا سکتی ہیں۔ انہوں نے زور دیا کہ تنازع کا فوری خاتمہ ممکن ہے، لیکن اس کے لیے یوکرین کو سنجیدہ اور عملی قدم اٹھانا ہوگا۔

دوسری جانب، قازقستان کے صدر قاسم جومارت توقایف نے اومسک میں روسی صدر ولادیمیر پوتن سے ملاقات کے دوران تجویز دی ہے کہ یوکرین تنازع کو فی الحال منجمد (Freeze) کیا جائے اور فریقین استنبول فارمولے کی بنیاد پر دوبارہ مذاکرات شروع کریں۔ واضح رہے کہ دونوں رہنماؤں نے اومسک میں منعقدہ روس-قازقستان بین العلاقائی تعاون فورم کے 22ویں اجلاس میں بھی شرکت کی تھی۔