حیدرآباد میں بی آئی ایس پی مستحقین سے غیر قانونی کٹوتیوں میں ملوث 5 ملزمان گرفتار

فیڈرل انویسٹی گیشن ایجنسی (ایف آئی اے) نے اندرونِ سندھ کے علاقے شہید بینظیر آباد میں کارروائی کرتے ہوئے بینظیر انکم سپورٹ پروگرام (بی آئی ایس پی) کے مستحقین سے غیر قانونی کٹوتیاں کرنے والے پانچ ملزمان کو گرفتار کر لیا ہے۔

ترجمان ایف آئی اے کے مطابق یہ کارروائی خفیہ اطلاع کی بنیاد پر کی گئی۔ گرفتار ملزمان کی شناخت امیر علی، فہد، عبدالمجید، مختیار اور نثار علی کے ناموں سے ہوئی ہے، جن کے خلاف جعلسازی، دھوکہ دہی اور مستحقین کی مالی امداد سے رقم کاٹنے کے الزامات کے تحت مقدمہ درج کر لیا گیا ہے۔

ایف آئی اے حکام نے بتایا کہ کارروائی کے دوران ملزمان کے قبضے سے 12 اے ٹی ایم کارڈز، 9 موبائل فونز، 2 بائیومیٹرک ڈیوائسز، ایک چیک بک اور 10 ہزار روپے نقد رقم برآمد ہوئی ہے۔ حکام کا کہنا ہے کہ معاملے کی مزید تفتیش جاری ہے اور اس غیر قانونی نیٹ ورک میں ملوث دیگر افراد کی گرفتاری کے لیے بھی چھاپے مارے جا رہے ہیں۔